Kailan Nagsimula ang Globalisasyon

Yugto ng Pagsisimula ng Globalisasyon

Ang pagsisimula ng globalisasyon ay mahahati sa ilang pangunahing yugto sa kasaysayan. Iba’t ibang mga pangyayari at pagbabago sa mundo ang naging bahagi ng pag-unlad ng globalisasyon. Narito ang ilang mahahalagang yugto:

Panahon ng Kolonyalismo (16th – 19th Siglo)

Ang panahon ng kolonyalismo ay nagbigay daan sa pagkakaroon ng ugnayan ng iba’t ibang bahagi ng mundo sa ilalim ng kapangyarihan ng mga kolonyal na kapangyarihan tulad ng Espanya, Portugal, Inglaterra, Pransiya, at Olanda. Ito ay nagdala ng pagpapakilala ng iba’t ibang kultura at produkto mula sa iba’t ibang bahagi ng mundo.

Makikita din ang impluwensiya ng Globalisasyon sa wika at kultura ng Africa, Asia at Americas na naging dulot ng pananakop ng mga Europeo. Ang mga kolonyal na kapangyarihan ay nagdadala ng kanilang kultura, wika, at mga produkto sa mga teritoryo na kanilang kinokontrol. Sa proseso ng kolonisasyon, nagkaruon ng malalim na pagpapalitan ng kultura at kalakalan sa pagitan ng mga kolonyal at lokal na kultura.

Ang kalakalan sa panahon na ito ay naging dahilan ng palitan ng mga ideya at mga produkto sa tulong ng mga galyon. May mga halaman at mga spices na nainpasok sa ilang mga Europeong bansa na dati ay hindi doon lumalaki, tulad ng mais, kamatis at pinya.

Nagdulot din ng malalaking bilang ng paglipat ng mga tao sa iba’t ibang bahagi ng mundo. Ang pangangailangang manggagawa para sa pagmimina, pagtatanim, at iba pang gawain ay nag-udyok sa migrasyon ng mga tao mula sa isang bansa patungo sa iba.

Ang Globalisasyon sa panahon na ito ang nagtanim ng ideya ng pagiging bansa sa mga kolonya dahil na din sa pagkalat ng mga pilosopiya na bunga ng Rebolusyong Pranses. Dahil sa printing press at steam engine naging mas mabilis ang palitan ng impormasyon na nagdulot sa malaking pagbabago sa maraming bahagi ng mundo.

Rebolusyong Industriyal (18th – 19th Siglo)

Ang pagsiklab ng rebolusyong industriyal sa Britanya at iba pang bahagi ng Europa ay nagdala ng malawakang pag-unlad sa industriyalisasyon at teknolohiya. Ang produksiyon ng kalakal at serbisyo ay mas naging masistemang internasyonal.

Ang pag-unlad ng makina at paggamit ng mga bagong paraan sa produksiyon ay nagpalakas sa produksiyon, na nagdulot ng pangangailangan para sa mas malawakang kalakalan ng kalakal. Ang mga imprastruktura tulad ng tren at barko ay nagdulot ng mas mabilis na transportasyon, na nagbukas ng mas malalawakang kalakalan sa buong mundo.

Ang pangangailangan sa mas maraming manggagawa para sa pabrika at industriyal na sektor ay nagdulot ng migrasyon ng mga tao mula sa kanilang mga rural ng lugar patungo sa mga urban na lungsod na naging pook ng industriya. Ito ay nagdala ng iba’t ibang kultura at tao sa iba’t ibang bahagi ng mundo. Ang mga lungsod ay naging sentro ng industriyal na aktibidad, negosyo, at kultura, na nagpalakas sa koneksyon sa pagitan ng mga rehiyon at bansa. Ang Industrial Revolution ay nagdulot ng malaking paglago ng mga lungsod at urbanisasyon.

Sa pagkakaimbento ng steam engine, telegrapo at automatikong makinarya naging mabilis ang paglago ng pandaigdigang komersyo, kasabay nito ang indutriyalisasyon at mass production.

Mga Ikalawang Digmaang Pandaigdig (1939-1945)

Ang digmaan ay nagdulot ng malaking disrupsiyon sa pandaigdigang kalakalan. Maraming bansa ang naapektohan at ang kanilang ekonomiya ay sumadsad dahil sa pagkasira ng imprastruktura, pagkakaroon ng hadlang sa kalakalang pandaigdig, at paglisan ng lakas paggawa patungo sa digmaan.

Sa panahon din na ito, ang mga bansang may mga kolonya ay ginamit ang kanilang mga teritoryo para sa suplay ng yaman at para sa pagmamaneho ng digmaan, na nagdulot ng pangangailangan para sa mas malawakang kalakalan.

Ang mga digmaang ito ay nagdala ng malawakang distraksyon at pagkasira sa maraming bahagi ng mundo. Pagkatapos ng digmaan, nagkaruon ng pangangailangan para sa internasyonal na kooperasyon at pagbangon muli ng mga apektado ng digmaan, na nagbigay daan sa pagtatag ng mga pandaigdigang organisasyon tulad ng United Nations.

Pagkatapos ng digmaan, maraming bansa ang nagkaruon ng pangangailangan para sa rehabilitasyon at rekonstruksyon. Ang mga programa ng Marshall Plan, halimbawa, ay nagbigay ng tulong pinansyal sa mga bansa sa Europa upang makabangon mula sa kaguluhang dulot ng digmaan. Ang ganitong mga programa ay nagkaruon ng malaking papel sa pag-angkin at pag-unlad ng ekonomiya sa pandaigdig

Mas lalong naging malapit ang ugnayan ng mga bansa at ekonomiya matapos maaprubahan ng maraming bansa ang General Agreement on Tariff and Trade(GATT). Ito ang pinakaunang multilateral na kasunduan sa kalakalan sa daigdig

Pagsiklab ng Neoliberal na Patakaran (1970s – 1980s)

Sa panahon ng dekada 1970 at 1980, maraming bansa ang nag-adopt ng neoliberal na patakaran na nagtataguyod ng mas malayang merkado at mas kaunting regulasyon. Ito ay nagdulot ng mas malaking papel ng pribadong sektor sa ekonomiya at nagpalakas sa internasyonal na kalakalan at pamumuhunan.

Sa panahon na ito lumitaw ang mga unang Multinational Companies(MNC) na kung saan ay ang mga dayuhang kompanya sa mga mayayaman na bansa ay nagsimulang magtayo ng mga negosyo sa mga “third-world” countries.

BASAHIN: Multinational Corporation at Transnational Corporation

Ang neoliberalismo ay madalas na kaakibat ng deregulasyon, o pagtanggal ng maraming patakaran at regulasyon na kontrolado ng pamahalaan. Ito ay nagbigay daan sa mas malayang pagkilos ng kalakalan, pag-unlad ng mga pandaigdigang korporasyon, at paglabas ng lokal na industriya patungo sa pandaigdigang merkado.

Ito ang nagtulak ng mas mataas na migrasyon ng manggagawa mula sa mga mahihirap na bansa patungo sa mga lugar na nangangailangan ng mas murang lakas paggawa.

Ang ideya ng malayang merkado at pandaigdigang kompetisyon ay nag-udyok sa mas maraming bansa na buksan ang kanilang ekonomiya sa pandaigdigang kalakalan. Ito ay nagdulot ng mas mataas na antas ng kompetisyon at pagbabago sa istruktura ng ekonomiya.

Paggamit ng Teknolohiya (20th Siglo)

Ang pag-usbong ng teknolohiya, tulad ng komunikasyon at transportasyon, ay nagpalapit sa mga bansa at nagpabilis sa paglipat ng impormasyon, kalakal, at serbisyo sa buong mundo.

Ang isa sa pinakamahalagang imbensyon sa panahon na ito ay ang Internet. Binago ng internet ang kalakalan at komunikasyon. Sa modernong panahon, ito ang isa sa mga imbensyon ng tao na higit na nagpabago sa pagkilos at kultura ng mga tao sa iba’t ibang bahagi ng mundo.

Ang mga nabanggit na yugto ay ilan lamang sa mga pangunahing bahagi ng kasaysayan ng globalisasyon. Ang globalisasyon ay isang patuloy na proseso at marami pang ibang aspeto at yugto ang maaaring isaalang-alang depende sa konteksto at perspektiba.